काठमाडौं-प्रहरी प्रधान कार्यालय, नक्सालमा कोरोना भाइरस संक्रमित हुनेको संख्या ७२ पुगेको छ।
नेपाल प्रहरीका प्रवक्ता एसएसपी कुवेर कडायतले कोरोना संक्रमितको संख्या ७२ पुगेको जानकारी दिए।
संक्रमितहरूलाई बलम्बुस्थित सशस्त्र प्रहरीको अस्पतालका भर्ना गरिएको छ। पहिले संक्रमित भएकाहरूको कन्ट्याक्ट ट्रेसिङको आधारमा स्वाब संकलन गरिएकामा कोरोना संक्रमण पुष्टी भएको उनको भनाई छ।
संक्रमितहरूमध्ये अधिकांश सवारी चालक, मेकानिक र मेसमा कार्यरत प्रहरीहरु रहेका छन्। संक्रमित प्रहरीहरूको कन्ट्याक्ट ट्रेसिङ मार्फत अन्य २० जनाभन्दा बढी प्रहरीलाई क्वारेन्टिनमा राखिएको उनको भनाई छ।
यो संगै देशभर कोरोना संक्रमण हुने प्रहरीको संख्या २ सय ५० पुगेको छ।
यसैबीच महानगरीय ट्राफिक प्रहरी महाशाखा रामशाहापथमा कार्यरत दुई ट्राफिक प्रहरीलाई कोरोनाभाइरस संक्रमण पुष्टि भएको छ। दुई दिनअघि पीसीआर परीक्षण गरिएका उनीहरुको रिपोर्ट पोजिटिभ आएको हो। उनीहरुमा कोरोना संक्रमण देखिएपछि ट्राफिक महाशाखामा कार्यरत अन्य ट्राफिक प्रहरीहरुको पिसिआर जाँच गर्ने तयारी भइरहेको छ।