बुटवल-लुम्बिनी प्रादेशिक अस्पताल बुटवलका प्रमुख मेडिकल सुपरिटेण्डेन्ट (मेसु) डा राजेन्द्र खनाललाई हटाउने निर्णय नभएको मुख्यमन्त्री तथा मन्त्रिपरिषद कार्यालयले जनाएको छ। यसअघि शंकर पोखरेल नेतृत्वको सरकारले जाँदाजाँदै साउन २७ गते मेसु डा. राजेन्द्र खनाललाई हटाई रेडियोलोजी विभाग प्रमुखमा स्थानान्तरण गर्ने निर्णय गरेको तत्कालीन मन्त्रीले सार्वजनिक गरेका थिए।
मेसुमा डा. ईन्द्र ढकाललाई नियुक्त गरेको तत्कालीन स्वास्थ्यमन्त्री भोजप्रसाद श्रेष्ठले जनाएका थिए। शंकर पोखरेल नेतृत्वको सरकारले राजीनामा दिएको एक सातापछि डा. खनाललाई मेसुबाट हटाउने निर्णय माइन्युट नभएको मुख्यमन्त्री तथा मन्त्रिपरिषद कार्यालयले जानकारी दिएको हो। ‘मेसु हटाउने निर्णय भएको छैन, मुख्य सचिव ज्यूबाट यो बारेको निर्णय माइन्युट भएकै छैन,’ मुख्यमन्त्री तथा मन्त्रिपरिषद कार्यालयका प्रवक्ता डा. खगेन्द्र सुवेदीले भने- ‘यसबारे निर्णय भयो भनेर कसरी समाचार आयो हामी पनि आश्चर्यमा परेका छौं।’
मेसु नियुक्तिका लागि डा. इन्द्र ढकालको निवेदन आएको तर नियुक्तिको निर्णय नभएको उनले स्पष्ट पारे। ‘चिठी आएको हो, तर चिठी आएर मात्र हुँदैन, मेसु परिवर्तनको आफ्नै प्रकृया हुन्छ,’ प्रवक्ता सुवेदीले भने, ‘मुख्य सचिवबाट माइन्युट नभएको निर्णयले कानूनी वैधता पाउँदैन।'
स्वास्थ्य तथा जनसंख्या मन्त्रालयका सचिव डा. विकास देवकोटाले मुख्यमन्त्री तथा मन्त्रिपरिषद कार्यालयबाट मेसु परिवर्तनको पत्र नआएको बताए। मुख्यमन्त्री तथा मन्त्रिपरिषद कार्यालयको वेबसाइटमा पनि मेसु हटाइएको निर्णय अद्यावधिक भएको छैन।
पूर्ववर्ती सरकारका प्रवक्ता बैजनाथ चौधरीले भने खनाललाई मेसुबाट हटाएर रेडियोलोजी विभागमा सरुवा गर्ने निर्णय मन्त्रिपरिषदले गरेको दोहोराए।
तत्कालीन स्वास्थ्यमन्त्री भोजप्रसाद श्रेष्ठले खनाललाई हटाएर ढकाललाई मेडिकल सुपरिटेन्डेन्ट बनाउन चाहेका थिए। सोही अनुसार आफ्नो सरकार विदा हुने निश्चित भएपछि अन्तिम दिन हतार–हतार मन्त्रिपरिषद वैठकबाट निर्णय गराउन खोजेका थिए। तर उक्त निर्णय माइन्युट नभएको पाईएको हो।
मन्त्रिपरिषदका निर्णय सार्वजनिक गर्दा यो कुरा ‘गोप्य’ राखिएको थियो । तर पत्रकारको प्रश्नमा तत्कालीन सरकारका प्रवक्ता चौधरी र तत्कालीन स्वास्थ्य तथा जनसंख्या मन्त्री भोजप्रसाद श्रेष्ठले डा. खनाललाई हटाउने निर्णय भएको र सो पदमा डा ईन्द्र ढकाल नियुक्त भएको बताएका थिए ।
कोरोना महामारीमा राम्रो काम गरेका कारण प्रदेश सरकारले खनाललाई २०७७ फागुन १ गते ‘क’ श्रेणीको पदकले सम्मान गरेको थियो। खनालले अस्पतालको भौतिक सुधारदेखि सेवा विस्तार र स्तर वृद्धिका काम गरिरहेका थिए। उनकै नेतृत्वमा अस्पतालका ७२ वटा सटर हटाउनेदेखि अस्पतालको इमर्जेन्सी, आइसियू व्यवस्थापन र रेडियोलोजी विभागको स्तर वृद्धि भएको थियो ।
