काठमाडौँ । नेकपा एकीकृत समाजवादीले सरकारमा सहभागी हुनका लागि तीन सदस्यीय कार्यदल बनाएको छ ।
नेकपा एकीकृत समाजवादी केन्द्रीय कार्यालयमा आज बसेको सचिवालय बैठकले अध्यक्ष माधवकुमार नेपाल, उपाध्यक्ष प्रमेश हमाल र महासचिव घनश्याम भुसाल रहने गरि तीन सदस्यीय कार्यदल बनाएको हो ।
बैठकपछि सञ्चारकर्मीहरूसँग कुरा गर्नुहुँदै पार्टी प्रवक्ता जगन्नाथ खतिवडाले समसामयिक राजनीति, केन्द्र र प्रदेश सरकारलगायत विभिन्न विषयमा छलफल गरिएको जानकारी दिनुभयो ।
नेकपा एकीकृत समाजवादीका अध्यक्ष नेपालसहित बनेको तीन सदस्यीय कार्यदलले सरकार गठन लगायतका विषयमा गृहकार्य अगाडी बढाउन निर्णय भएको प्रवक्ता खतिवडाले बताउनुभयो ।
कार्यदलले गठबन्धन बैठकमा पार्टीले पाउने मन्त्रालयबारे छलफल गर्ने, सरकारमा जाने मन्त्रीहरू छान्ने, नीति तथा कार्यक्रम बनाउने, केन्द्रदेखि प्रदेशसम्म मन्त्रालय बाँडफाँटलगायतबारे गृहकार्य गर्ने उहाँको भनाई छ ।
