काठमाडौँ–सरकारले अत्यावश्यक बाहेकका सरकारी कार्यालयका बन्द गर्ने निर्णय गरेको छ।
उच्चस्तरीय समन्वय समितिको बैठकले अत्यावश्यक बाहेकका सरकारी कार्यालय बन्द गर्ने निर्णय गर्दै स्वास्थ्य, सुरक्षा, खाद्यवस्तु, खानेपानी, दुग्ध, सूचना तथा सञ्चार, भन्सार, क्वारेन्टाइन, फोहोरमैला व्यवस्थापनलगायतका अत्यावश्यक बाहेकका कर्मचारीलाई कार्यालय प्रमुखले बिदा दिनसक्ने निर्णय गरेको छ।
उच्च स्तरीय समितिका संयोजक समेत रहेका उपप्रधानमन्त्री ईश्वर पोखरेलले अत्यावश्यकबाहेकका कार्यालयका कर्मचारीलाई घरमै अलर्ट अवस्थामा रहने गरी कार्यालय प्रमुखले बिदा दिनसक्ने गरी निर्णय भएको बताए।
यस्तै निजी क्षेत्रका उद्योग कलकारखानालाई पनि बिदा गर्न सरकारले निर्देशन दिएको छ।
इन्धन लगायत अत्यावश्यक क्षेत्रका उद्योगबाहेक सबै बन्द गरिने उपप्रधानमन्त्री पोखरेलले बताए। यस्तै 'लकडाउन' को समयमा कालाबजारी गर्नेलाई कारबाही गरिने र औषधि लगायतका सामग्री जफत गरी वितरण गरिने अधिकारीहरूले जनाएका छन्। त्यसबाहेक यसको कार्यान्वयनका लागि सबै जिल्लाका प्रमुख जिल्ला अधिकारीलाई निर्देशन दिइएको छ।
यस्ता छन् निर्णयहरु :-
१. औषधी उपचार, खाद्यवस्तु खरिदजस्ता अत्यावश्यक काममा बाहेक कुनै पनि व्यक्ति घरबाट बाहिर ननिस्कने।
२. अनुपतिप्राप्त सवारी साधन, स्वास्थ्यकर्मी, सुरक्षा निकायले प्रयोग गर्नेबाहेक सबै प्रकारका सार्वजनिक वा निजी यात्रुवाहक सवारी साधन सञ्चालनमा पूर्ण रोक लगाउने।
३. सुरक्षा निकायबाट प्रयोग हुने वायुयान र तोकिएका अन्य उडानहरु बाहेक अन्य सबै आन्तरिक व्यवसायिक उडानहरु बन्द गर्ने।
४. स्वास्थ्य, सुरक्षा, खाद्यवस्तु, खानेपानी, दूध, विद्युत, दूरसञ्चार, सूचना तथा सञ्चार, भन्सार, क्वारेन्टाइन, फोहोरमैला व्यवस्थापनजस्ता अति आवश्यक सेवाबाहेक अन्य कार्यालय सञ्चालनकोलागि आवश्यक पर्ने कर्मचारीहरु मात्र उपस्थित हुने गरी सम्बन्धित कार्यालय प्रमुखले बिदा दिने।
५. औषधि तथा स्वास्थ्य उपकरण, खाद्यवस्तु, खानेपानी, दूध, इन्धन उत्पादन गर्ने उद्योगहरु बाहेक निजी क्षेत्रबाट सञ्चालित अन्य उद्योग, कलकारखानाहरुमा काम गर्ने श्रमिक, कर्मचारीहरुलाई सम्बन्धित उद्योगले विदा दिने व्यवस्था मिलाउने।
६. व्यवसायीहरुले औषधि र औषधिजन्य सामाग्रीहरुको नियमित आपूर्तिको व्यवस्था गर्ने। अभाव देखाई मुल्य बृद्धि गर्ने वा कालोबजारी,जम्माखोरी गर्ने वा लुकाउने वा आपूर्तिमा अवरोध गर्ने व्यक्तिलाई प्रचलित कानून बमोजिम नियन्त्रणमा लिने, सामाग्री जफत गरी रोगको रोकथाम र उपचारको कार्यमा उपयोग गर्ने।
७ संक्रमण रोग ऐन, २०२० को दफा २ को उपदफा (२) बमोजिम जारी यस आदेशको कार्यान्वयन गर्नका लागि आवश्यक व्यवस्था मिलाउन नेपाल राज्यका सबै प्रमुख जिल्ला अधिकारीलाई मुकरर गर्ने र सोको लागि स्थानीय प्रशासन ऐन, २०२८ को समेत आवश्यकता अनुसार प्रयोग गर्ने।
८. संक्रमण रोग ऐन २०२० अन्तर्गत जारी आदेशको अवहेलना गर्ने वा काममा वाधा पुर्याउने व्यक्तिलाई सोही ऐन बमोजिम सजाय हुने ।