बुटवल-नेपाली काँग्रेस बुटवल नगरसमितिले बुटवलको ज्योतिनगर–लक्ष्मीनगर क्षेत्रका पहिरो प्रभावितहरुलाइ तत्काल राहत प्याकेज उपलब्ध गराउन प्रदेश सरकारसंग माग गरेको छ ।
काँग्रेसको बुटवल उपमहानगर समितिले आज लुम्बिनी प्रदेशका मुख्यमन्त्री कुलप्रसाद केसीलाइ ज्ञापन पत्र बुझाउँदै पहिरो प्रभावितहरुलाइ अल्पकालिन र दीर्घकालिन राहत प्याकेज सहित उचित व्यवस्थापनको माग गरेको हो ।
मुख्यमन्त्रीलाइ ज्ञापन पत्र बुझाउँदै नेपाली काँग्रेस बुटवल उपमहानगर समितिका सभापति खेलराज पाण्डेले जनताको जनजीवीकाका बिषयलाइ गम्भिरतापूर्वक लिन र सम्बोधन गर्न मुख्यमन्त्री केसीलाइ आग्रह गरे ।
पहिरो प्रभावितहरुलाइ प्रदेश सरकारका तर्फबाट तत्काल राहत र व्यवस्थापनमा ध्यान दिनु पर्ने, तिनाउ दानव नदिको कटानलाइ मध्येनजर गर्दै तटबन्धनको प्रबन्ध मिलाउन,राजमार्ग चौराह देखि गोलपार्क सम्मको सडक मर्मत सम्भारमा ध्यान दिन काँग्रेसले माग गरेको छ ।
बुटवल राजमार्ग चौराह–गोलपार्क खण्डमा ठुलठुला खाल्डाखुल्डी र धुलोले दुर्घटनाको जोखिम बढ्नुका साथै प्रदुषणले नगरबासीको स्वास्थ्य जोखिममा परेको भन्दै काँग्रेस नगरसभापति पाण्डेले प्रदेश सरकारको ध्यानाकर्षण गराए।
काँग्रेसले बेलवास–वेथरी सडक निर्माण छिटो सक्न,नजिकिदै गरेका चाडपर्वको समयमा हुनसक्ने मुल्यबृद्धि, खाद्यवस्तुमा हुने मिसावट तथा कालोबजारीलाइ रोक्ने तर्फ ध्यान दिन प्रभावकारी अनुगमन निरीक्षणको व्यवस्था गर्न पनि माग गरेको छ ।
ज्ञापन पत्र बुझदै मुख्यमन्त्री केसीले पहिरो पिडीतलाइ राहत,उद्यार र व्यवस्थापनलाइ प्राथमिकता दिएर तथ्याङ्क संकलन गरीरहेको बताउनु भयो । चाडपर्व अघि नै राहत प्याकेज पहिरो प्रभावितहरु समक्ष पुर्याउने प्रतिबद्धता मुख्यमन्त्री केसीले जनाए।
‘राहत तथा पुनःस्थापनाकालागि जिल्ला प्रशासनलाइ तथ्याङ्क संकलनको निर्देशन दिइसकेका छौं,सरोकारवाला बिच बैठक राखेर थप छलफल गर्दैछौं, केही दिन भित्रैमा प्रभावितहरुले त्यसको अनुभुती गर्नुहुनेछ’ मुख्यमन्त्री केसीले भने।
शहरी विकास तथा पर्यटन मन्त्री डिल्ली चौधरीलाइ पनि सोही ज्ञापन पत्र बुझाउँदै ध्यानाकर्षण गराएको काँग्रेस नगरसचिव छाँया पोखरेलले बताए।
