बुटवल-शुक्रबार राती आएको वर्षाका कारण खसेको पहिरोले पाल्पाको तिनाउ गाउँपालिकाको दोभान, झुम्सा र घोसेबासका ८ वटा घरमा क्षति भएको छ। दोभान प्रहरी चौकीका हवल्दार चुरामणि पोखरेलका अनुसार दोभानको घोडेबासका टिकाराम खरेल, यज्ञ खरेल र नारायण खरेलको घरमा क्षति पुगेको छ।
तिनाउ गाउँपालिका–२ कै भीमबहादुर भुजेलको घर पूर्ण रुपमा क्षति भएको छ। तिनाउ गाउँपालिका–३, सिद्धार्थ राजमार्ग क्षेत्रका अर्घाछापका लीलाबहादुर थापाको घर, च्याउघरलगायतमा पहिरोले क्षति पुगेको स्थानीय तोया लम्सालले जानकारी दिए।
कतिपय घरहरु पहिरोसँगै आएका रुख ढलेर च्यापिएका छन्। तिनाउ गाउँपालिका–३, कै अमरसिंह प्रधान र राजबहादुर श्रेष्ठको घर पहिरोको जोखिममा छ। पहिरोले असर पुर्याएका स्थानहरुबाट आएको जानकारीअनुसार मानवीय क्षति भएको छैन।
तर, कुन ठाउँमा कति क्षति भयो भन्ने विवरण संकलन नभइसकेको दोभान प्रहरी चौकीले जनाएको छ।
