बुटवल-बुटवलमा कोरोना भाइरस संक्रमणको आशंकामा एकजनालाई भर्ना गरिएको छ। बुटवलस्थित लुम्बिनी प्रादेशिक अस्पतालमा २१ वर्षका एक युवालाई अस्पतालको आइसोलेशन वार्डमा राखेर उपचार भइरहेको लुम्बिनी प्रादेशिक अस्पतालका डा. सुदर्शन थापाले पुष्टि गरे। डा थापालाई प्रदेश ५ को सामाजिक विकास मन्त्रालयले लुम्बिनी प्रादेशिक अस्पतालको फोकल पर्शन तोकेको छ।
उनका अनुसार ती युवामा कोरोना भाईरसको संक्रमणका कारण देखिने लक्षणहरु देखिएका छन्। 'कडा किसिमको निमोनिया देखिएको छ कोरोना संक्रमणका कारण देखिने लक्षणहरु देखिएका छन्-उनले लुम्बिनी टाइम्ससँग भने-तर कोरोना नै हो कि होइन भनेर पूर्ण परीक्षण गर्न बाँकी छ, भोलि शुक्रबार हामीले उनको नमूना परीक्षणका लागि काठमाडौं पठाउँदैछौं।'
ती युवा केही समयअघि विदेशी नागरिकहरु समेत सहभागी भएको एक तालिममा सहभागी भएका थिए। उनलाई बिहीबार मात्रै अस्पतालमा भर्ना गरिएको थियो।
बिरामीमा देखिएका लक्षणहरू मिलेकाले आईसोलेशनमा राखेर उपचार गर्ने र कोरोना छ छैन भनेर परीक्षण गर्ने अस्पतालका मेडिकल सुपरिटेन्डेन्ट डा. राजेन्द्र खनालले बताए। उनले बिरामीको अवस्था सामान्य रहेको बताउँदै संक्रमणको शंका मात्रै रहेकाले आत्तिनु नपर्ने बताए । उनले हल्लाभन्दा बढी सतर्कता अपनाउनु जरूरी रहेको बताए।
'अहिले नै आत्तिनु पर्दैन, तर सचेतना र सतर्कता अपनाउन जरूरी छ'-उनले लुम्बिनी टाईम्ससँग भने।
लुम्बिनी प्रादेशिक अस्पतालमा कोरोना संक्रमण भएका बिरामीलाई उपचारका लागि २ वटा आइसोलेशन वार्ड तयारी अवस्थामा राखिएको उनले बताए।