रुपन्देही । प्रतिनिधि सभा र प्रदेश सभाको निर्वाचन नजिकिदै गर्दा राजनीतिक दलका उम्मेदवारहरु मतदाता रिझाउन लागि परेका छन् । पार्टीका एजेण्डा सहित घरघरमा पुगेर उम्मेदवारहरुले मतदातासँग मत मागिरहेका छन् ।
रुपन्देहीका राजनीतिक दलका उम्मेदवारहरु जिल्लाको विकासलाई नै प्रमुख एजेण्डा बनाएका घरदैलोमा जुटेका हुन् । जिल्लालाई विकासको रोल मोडल बनाउने प्रतिवद्धता सहित उम्मेदवारहरु मतदातामाझ पुगेका छन् ।
सत्ता गठबन्धन नेपाली कांग्रेसका उम्मेदवारहरु निर्वाचन क्षेत्रमात्र नभई जिल्लालाई मुलुककै विकासको मुख्य केन्द्र बनाउने प्रतिवद्धता सहित चुनावी मैदानमा छन् भने नेकपा एमालेका उम्मेदवारहरु पनि पूर्वाधार र मानवीय विकासका दृष्टिले रुपन्देहीलाई विकासको नमुना जिल्ला बनाउने भन्दै मतदातासँग मत मागिरहेका छन् । जिल्लामा एमालेले राप्रपा र जनता समाजवादी पार्टीसँग गठबन्धन गरेको छ ।
मन्त्री भइसकेका विभिन्न पार्टीका प्रभावशाली नेताहरु चुनावी मैदानमा रहेकाले पाँच वटा निर्वाचन क्षेत्र रहेको रुपन्देही यतिबेला चर्चामा छ । पाँच दलीय गठबन्धनबाट गृहमन्त्री बालकृष्ण खाण रुपन्देही क्षेत्र नम्बर ३ बाट प्रतिनिधिसभा सदस्यका लागि चुनावी मैदानमा हुनुहुन्छ । उहाँसँग पूर्वमन्त्री तथा राष्ट्रिय प्रजातन्त्र पार्टीका नेता दिपक बोहोरा प्रतिष्पर्धामा हुनुहुन्छ ।
२०७४ को निर्वाचनमा कांग्रेस र राप्रपाबीच गठबन्धन थियो भने राप्रपाका बोहरा कांग्रेसको समर्थनमा चुनाव लड्नुभएको थियो । त्यसबेला बोहोरालाई जिताउन हलो चिन्हमा मत माग्दै हिँडेका खाण अहिले बोहराकै प्रतिस्पर्धी हुनुहन्छ । खाण २०७४ मा समानुपातिक उम्मेदवार हुनुभएको थियो । उहाँले रुपन्देहीको विकासमा आफ्नो पनि भूमिका रहेकाले यस पटक पनि साथ दिन मतदातासँग आग्रह गर्नुभएको छ ।
पञ्चायत कालमा चारपटक र गणतन्त्रपछि तीनपटक मन्त्री भइसकेका ७२ वर्षका बोहोराले यसपटकको चुनाव आफ्ना लागि अन्तिम भएको बताउनुभएको छ । बोहोराले राष्ट्रियताको रक्षा, रुपन्देहीको विकास र र समृद्धिका लागि आफुलाई मत दिन आग्रह गर्नुभएको छ ।
बोहोरा एमाले र जनता समाजवादी पार्टी (जसपा) को समर्थनमा चुनावी मैदानमा उत्रिनुभएको छ । खाण भने सत्ता गठबन्धन र लोकतान्त्रिक समाजवादी (लोसपा) का साझा उम्मेदवार हुनुहन्छ ।
२०६४ मा भएको पहिलो संविधानसभा निर्वाचनमा रुपन्देही १ मा माओवादी केन्द्रका घनश्याम यादवसँग पराजित भएका बोहोरा २०७० को दोस्रो संविधानसभा निर्वाचनमा तत्कालीन २ नम्बर क्षेत्र (हाल ३) मा कांग्रेसका रामकृष्ण ताम्राकारलाई पराजित गर्दै विजयी हुनुभएको थियो । बोहोरा २०७४ मा रुपन्देही ३ मा एमालेका घनश्याम भुसालसँग पराजित हुनुभएको थियो ।
क्षेत्र नं २ बाट पूर्व अर्थमन्त्री तथा एमाले उपाध्यक्ष विष्णुप्रसाद पौडेल प्रतिनिधी सभाको निर्वाचन लड्दै हुनुहन्छ । क्षेत्र नं २ मा भने सत्ता गठबन्धनका उम्मेदवार राजु गुरुङको उम्मेदवारी खारेज भइसकेको छ । निर्वाचन आयोगले कर्जा सूचना केन्द्रको कालोसूचिमा नाम रहेकाले उम्मेदवारी खारेज गरिदिएपछि गुरुङ आयोगको निर्णय विरुद्ध सर्वोच्च अदालत जानुभएको थियो । तर, अदालतले निर्वाचन आयोगको निर्णयलाई सदर गरिदिएको थियो ।
सत्ता गठबन्धनका उम्मेदवारको उम्मेदवारी नै खारेज भएपछि लगातर ३ पटकसम्म यहाँबाट निर्वाचन जितेर पटक–पटक मन्त्री भएका एमाले उपाध्यक्ष पौडेलको पक्षमा जनमत जुट्ने आँकलन धेरैको छ ।
यद्यपी उम्मेदवार विहीन भएको सत्ता गठबन्धनले जनमुक्ति पार्टी उम्मेदवार बनेका केशब बहादुर थापा सूर्यवंशीलाई समर्थन गरेको छ । थापा राष्ट्रिय जनमुक्तिका केन्द्रिय कार्यकारी अध्यक्ष भए पनि यस क्षेत्रका लागि त्यति परिचित अनुहार नभएकाले यसपटको निर्वाचन पौडेललाई सहज छ भन्नुहुन्छ, स्थानीय पोषकान्त पोखरेल ।
यस्तै रुपन्देहीको क्षेत्र नं १ मा सत्ता गठबन्धनका तर्फबाट पूर्व मन्त्री घनश्याम भुसाल र एमालेका पोलिटब्युरो सदस्य छबिलाल विश्वकर्मा प्रतिष्पर्धामा हुनुहुन्छ । निर्वाचनकै मुखमा एमाले छोडेर सत्ता गठबन्धनको समर्थनमा निर्वाचनमा जानुभएका भुसालले स्थानीय तहमा शिक्षा, स्वास्थ्य, बाटोघाटो तथा भौतिक निर्माणका काममा तीब्रता दिने प्रतिवद्धता सहित चुनावी अभियानमा लाग्नुभएको छ ।
अर्का उम्मेदवार विश्वकर्माले भने र विकास र समृद्धिको ऐजण्डा एमालेको भएकाले अधुरा योजना सुरु गर्न र नयाँ योजनाको थालनी गर्न एमालेका उम्मेदवारलाई मत दिन आग्रह गर्नुभएको छ । उत्तर दक्षिण जोड्ने गरी क्षेत्र नम्वर १ को विकासको काम दशगजाबाट शुरुवात गरेको र ५ बर्ष यता विकासले फड्को मारेको दावी उहाँको छ ।
क्षेत्र नं ५ मा सत्ता गठबन्धनका तर्फबाट प्रतिनिधी सभाका लागि भरतकुमार शाहले र एमालेका उम्मेदवार बासुदेव घिमिरे चुनावी मैदानमा हुनुहुन्छ । क्षेत्र नं ५ को विकासका लागि आफुलाई मत दिन आग्रह गर्दै शाह घरदैलोमा जुटनु भएको छ ।
काँग्रेसका नेता शाहले यसअघि २०७४ को निर्वाचनमा नेकपा एमालेको समर्थनमा नेकपा माओवादी केन्द्रबाट चुनाव लडेका डिलाराम आचार्यलाई पराजित गर्नुभएको थियो ।
तिलोत्तमा नगरपालिकाको प्रमुख भइसक्नुभएका घिमिरेले लुम्बिनी सहित क्षेत्र नं ५ को विकासका लागि एक पटक अवसर दिन मतदातासँग अनुरोध गर्नुभएको छ । तिलोत्तमाको प्रमुख हुँदा दुई पटक देशकै उत्कृष्ट नगरपालिका घोषणामा महत्वपूर्ण भूमिका निर्वाह गरेकाले क्षेत्र नं ५ को विकासका लागि जनताले सथ दिने उहाँको विश्वास छ ।
क्षेत्र नं ४ मा सत्ता गठबन्धनबाट कांग्रेसका प्रमोद यादव र पूर्वमन्त्री जनता समाजवादी पार्टीबाट ओमप्रकाश यादव चुनावी प्रतिष्पर्धामा हुनुहन्छ । प्रमोद यादवले ०७४ को निर्वाचनमा लोकतान्त्रिक समाजवादी पार्टीका नेता सर्वेन्द्रनाथ शुक्ललाई पराजित गर्नुभएको थियो ।
एमाले र राप्रपाको समर्थनमा उम्मेदवार बन्नुभएका ओमप्रकाश गतवर्ष एमाले द्धाडेर जसपा प्रवेश गर्नुभएको हो । उहाँ कृषिराज्य मन्त्री समेत बन्नुभएको थियो । दुवै जना उम्मेदवार क्षेत्र नं ४ को पूर्वाधार विकासका लागि जिताउन आग्रह गर्दै मतदातामाझ पुग्नुभएको छ ।
यसै प्रदेश सभाका उम्मेदवारहरु पनि विकास र समृद्धिको एजेण्डा सहित मतदातामाझ पुग्नुभएको छ ।
जिल्लामा सत्ता गठबन्धनका तर्फबाट प्रदेश सभाका लागि क्षेत्र नं १ (१)मा अब्दुल रज्जाक, (२) मा विश्वनाथ यादव, क्षेत्र नं २(१) मा दीर्घबहादुर केसी २ (२) मा बामदेव क्षेत्री, क्षेत्र नम्बर ३(१) मा सन्तोष कुमार पाण्डे, क्षेत्र नम्बर ३ (२) मा रामचन्द्र ढकाल, क्षेत्र नं ४(१) मा अष्टभुजा पाठक, ४ (२) मा वसीउद्धिन खाँ तथा क्षेत्र नं ५ (१) मा विनोद पहाडी र ५ (२) मा फखरुद्धिन खान प्रदेश सभा निर्वाचनका लागि चुनावी मैदानमा हुनुहुन्छ ।
यता एमाले, जसपा र राप्रपा गठबन्धनका तर्फबाट क्षेत्र नं १(१) मा आशिष चौधरी र १(२) मा दधिराम न्यापाने चुनावी प्रतिष्पर्धामा हुनुहन्छ ।
त्यस्तै क्षेत्र नं २ को १(१) मा लिला गिरी, २(२) मा भोजप्रसाद श्रेष्ठ , क्षेत्र नम्बर ३ (१)बाट महेन्द्र यादव र ३ (२) मा तुल्सी प्रसाद चौधरी, क्षेत्र नं ४ (१) मा सुनिल गिरी, ४ (२) मा आमअवतार यादव, क्षेत्र नं ५ (१) मा भूमिश्वर ढकाल र ५(२) मा रामचन्द्र यादव प्रदेश सभाका लागि चुनावी प्रचार अभियानमा लाग्नुभएको छ ।
