काठमाडौं– चालु आर्थिक वर्षको पहिलो ७ महिनासम्म नेपालको व्यापार सुधारतर्फ गएको पाइएको छ। चालु आर्थिक वर्षका ७ महिनामा नेपालको व्यापार घाटा ७ खर्ब ३८ करोड ६३ लाख रुपैयाँ रहेको भन्सार विभागले जनाएको छ । सात महिनामा नेपालको व्यापार घाटा ५.३३ प्रतिशतले घटेको छ।
भन्सार विभागका अनुसार चालु आर्थिक वर्षको साउन महिनादेखि माघ समान्तसम्म विदेशबाट वस्तु आयात ३.५६ प्रतिशतले घटेको छ।
सात महिनामा ८ खर्ब ३ अर्ब ६० करोड रुपैयाँ बराबरको वस्तु आयात भएको छ। गत वर्ष को सोही अवधिमा ८ खर्ब ३३ अर्ब २६ करोड रुपैयाँ बराबरको वस्तु आयात भएको थियो।
आर्थिक वर्षको सुरुदेखि नै बढेको निर्यात माघ महिनासम्म पनि बढिरहेको थियो। सात महिनामा निर्यात २२.४१ प्रतिशतले बढेको छ। सात महिनाको अवधिमा नेपालले गत वर्षको सोही अवधिको तुलनामा झन्डै १२ अर्ब बढीको वस्तु निर्यात गरेको छ।
७ महिनको अवधिमा ६४ अर्ब ९७ करोड १२ लाख रुपैयाँ बराबरको वस्तु निर्यात भएको विगागले जनाएको छ। गत वर्ष सोही अवधिमा ५३ अर्ब ७ करोड रुपैयाँको वस्तु निर्यात भएको थियो । तर पुस महिनाको तुलनामा भने माघमा निर्यात घटेको छ । पुसमा निर्यात २६ दशमलव १३ प्रतिशतले बढेको थियो।
विशेषगरी भारतले नेपालबाट पाम आयल लैजान प्रतिबन्ध लगाएपछि नेपालको समग्र निर्यात घटेको हो। पुसदेखि माघसम्म पाम आयल निर्यात नै भएको छैन। यस्तै आयातको दर पनि बढेको छ। पुस महिनासम्म आयात दर ४ .०४ प्रतिशतले घटेकोमा माघ महिनामा यो ३.५६ प्रतिशतले मात्रै घटेको छ।