लुम्बिनी । प्रत्येक वर्ष बैशाख शुक्ल पूर्णिमा दिन मनाईने बुद्धजयन्ती एवं लुम्बिनी दिवसको तयारी शुरु भएको छ । संस्कृती पर्यटन तथा नागरिक उडड्यन मन्त्रालय अन्तर्गत रहेको लुम्बिनी विकास कोषले बुद्धजयन्ती एवं लुम्बिनी दिवसका रुपमा यसलाई भव्यताका साथ मनाउँदै आएको छ । आगामि जेठ १० गते परेको २५६८ औं बुद्धजयन्ती एवं लुम्बिनी दिवस बजेट अभावका कारण बुद्धजयन्तीको तयारी तिव्र रुपमा अगाडि बढ्न सकेको छैन ।
संघीय सरकारले बुद्धजयन्तीका लागि प्रत्येक वर्ष छुट्याउँदै आएको बजेट कटौती भएपछि यो वर्ष बुद्धजयन्तीको तयारीमा ढिलाई भइरहेको छ । संघीय सरकारले बार्षिक रुपमा १ देखि ४ करोडसम्म बुद्धजयन्तीका लागि बजेट छुट्याउने गरेकोमा आर्थिक वर्ष २०८१/८२ मा भने बजेट छुट्याएको छैन । कोभिड महामारीपछि २०७९ सालमा २५६६ औं बुद्धजयन्ती भारतीय प्रधानमन्त्री नरेन्द्र मोदीको उपस्थितीमा भव्यताका साथ मनाएको थियो । त्यतिखेर संघीय सरकारले ३ करोड बढि बजेट छुट्याएको थियो ।
भगवान बुद्धको सबैभन्दा महत्वपूर्ण दिनका रुपमा बैशाख पूर्णिमालाई लिने गरिएको र विगतदेखि नै बुद्धजयन्तीलाई उत्सवका रुपमा मनाउने गरिएकोमा यो वर्ष संघीय सरकारले बजेट कटौती गर्दा त्यसले बुद्धजयन्ती भव्य रुपमा मनाउन चुनौती देखिएको लुम्बिनी विकास कोषका योजना प्रमुख स्मिता भट्टले बताईन । उनले कोषका तर्फबाट व्यवस्थापन गर्ने तयारी भएपनि संघीय सरकारले बजेट नदिदा भव्य बनाउन कठिन हुने बताइन । लुम्बिनी विकास कोषले प्रशासनिक र अन्य विकासका कामहरु समेत पर्यटकहरुको दान एंव प्रवेश शुल्कको टिकटबाट प्राप्त हुने आम्दानीबाट हुँदै आएको छ ।
लुम्बिनी होटल संघका अध्यक्ष गोविन्द ज्ञवालीले बुद्धजयन्तीलाई सरकारले राष्ट्रिय पर्वका रुपमा मनाउनुपर्नेमा त्यसो नभएको बताउनुभयो । संघीय सरकार अन्तर्गत रहेको संस्कृती पर्यटन तथा नागरिक उड्डयन मन्त्रालयले बुद्धजयन्तीका बेलामा ५० लाख १ करोड नभई पर्याप्त बजेट छुट्याएर मनाउनुपर्ने उहाँको सुझाव छ । बुद्धजयन्ती एक दिनका लागि मात्रै नभई कम्तीमा एक हप्तासम्म मनाउनुपर्ने उहाँले बताउनुभयो । ‘बुद्धिष्ट देशका राजदूत, कुटनितिक नियोगका प्रमुख, विदेशी पाहुनाहरु ल्याएर मनाउनुपर्छ’ उहाँले न्नुभयो ‘झारा टार्ने गरी मनाउनु हुँदैन ।’ उहाँले साँच्चिकै लुम्बिनीमा बुद्ध जन्मेको हो भनेर छाप छोड्ने गरी बुद्धजयन्ती मनाउनुपर्नेमा त्यसो हुन नसकेको बताउनुभयो ।
विश्वभरका बौद्धधर्माम्बलम्बीहरुलाई बुद्धजयन्तीमा लुम्बिनी आउने वातावरणका लागि सरकारले पर्याप्त बजेट छुट्याएर भव्य कार्यक्रम गर्नुपर्ने उहाँको भनाई छ । बुद्धजयन्तीमा विदेशी पाहुनाहरु आउँदा त्यसले स्थानीय होटल व्यवसायीहरुलाई पनि चलायमान बनाउने बताउनुभयो । बुद्धजयन्तीमा स्थानीयहरुलाई जोडेर, प्रदेश स्थानीय र संघस्य सरकारले संयुक्त रुपमा मनाउन सके त्यसले राम्रो सन्देश दिने अध्यक्ष ज्ञवालीले बताउनुभयो ।
बुद्धजन्मस्थल लुम्बिनी आएका तीर्थालुहरुले समेत बुद्धजयन्ती तथा लुम्बिनी दिवसको कुनै तयारी नदेख्दा आश्चर्य प्रकट गरेका छन् । पक्लिहवा कृषि क्याम्पस भैरहवामा अध्ययनरत दाङका नरेश उपाध्यायले तीन सातापछि हुने बुद्धजयन्तीको कुनै पनि तयारी नदेखिदा अचम्म लागेको बताउनुभयो । उहाँले बुद्धको जन्मजयन्तीमा विश्वभरका बौद्धमार्गीहरुलाई लुम्बिनी आउने वातावरण बनाउनुपर्ने सुझाव दिनुभयो । ‘केही वर्षअघि छिमेकी मुलुक भारतका प्रधानमन्त्री नरेन्द्र मोदी समेत आएर बुद्धजयन्ती मनाईएको थियो । अब पनि त्यस्तै अन्र्तराष्ट्रिय उच्च ओहोदाका व्यक्ति, विदेशी कुटनितिक निकायका प्रतिनिधि एंव विश्वभारका बौद्धिष्टहरुलाई ल्याउन सके त्यसले लुम्बिनीलाई थप उचाईमा पु¥याउन सहयोग गथ्र्यो’ उहाँले भन्नुभयो ।
जेठ १० गतेको बुद्धजयन्तीका लागि लुम्बिनी विकास कोषले बजेट अभावकै कारण मूल आयोजक समिति गठन गर्ने वाहेक अन्य तयारी गरेको छैन । कोषले २५६८ औं बुद्धजयन्तीका लागि ५६८ सदस्यीय मूल आयोजक समिति गठन गरेको छ ।
बुद्धजन्मस्थल लुम्बिनी आफैमा नेपालको सम्पत्ति भएकाले यसको विश्वव्यापी प्रचारका लागि बुद्धजयन्तीलाई अवसरका रुपमा लिनुपर्नेमा त्यसो नभएकोमा अर्घाखाँचीकी बसन्ता विश्वकर्माले चिन्ता व्यक्त गर्नुभयो । विश्भर नेपाल चिनाउने बुद्ध भएकाले आउँदै गरेको बुद्धजयन्तीलाई सरकारले औपचारीक रुपमा सार्वजनिक विदा दिएर मात्रै मनाउन नहुने बताउनुभयो ।
बुद्धपूर्णिमालाई नेपाल सहित बौद्ध राष्ट्रहरु भुटान, थाईल्याण्ड, म्यानमार, मंगोलिया, कम्बोडिया, श्रीलङका, लाओसमा राजकीय सम्मानका साथ मनाउँछन् । यस्तै नेपाल सहित चीन भारत युरोप लगायतका देशहरुमा सम्मानको साथ मनाउने गरिएको छ ।
गौतम बुद्धको जन्मभूमि नेपाल रहेकाले यहाँ बुद्धजयन्तीलाई बिशेष उत्सव र नेपालको पर्वका रुपमा मनाउनुपर्ने सारोकारवालाहरुको माग छ । लुम्बिनी साँस्कृतिक नगरपालिका वडा न. ३ का वडाअध्यक्ष अकरामुद्दिन नाउ मुसलमानले सरकारले बुद्धजयन्तीमा स्थानीयहरुलाई समेत जोडेर राष्ट्रिय उत्सवका रुपमा मनाउनुपर्ने बताउनुहुन्छ । उहाँले बुद्धजयन्तीलाई बुद्धका सन्देशहरु र दर्शन बुझ्ने र लुम्बिनीको प्रचार विश्वव्यापी बनाउने गरी मनाउनुपर्ने बताउनुभयो ।
नेपामा तत्कालिन राजा त्रिभुवनले वि.स.२००६ साल जेठ ८ गतेदेखि सरकारी तवरबाट मान्याता दिए पछि नेपालमा रहेको लाखौ बौद्धमार्गी नेपालीले बुद्धजयन्ती मनाउन थालेका हुन् । लुम्बिनीमा वि.स. २०५५ मा ऐतिहासिक प्रथम विश्व बौद्ध शिखर सम्मेलन भएपछि बुद्धजयन्तीकै दिन सरकारले लुम्विनी दिवश पनि मानाउन थालेको हो ।
विभिन्न बौद्ध मुलुकहरुको विशेष पहलमा १९९९ देखि संयुक्त राष्ट्रसंघ समेत अन्तराष्ट्रिय रुपमै बुद्धजयन्तीलाई मान्यता प्रदान गरि सो दिनमा विश्वभर रहेका आफ्ना सबै कार्यालयहरुमा बुद्धजयन्ती मनाउन बिदा दिदै आएको छ ।