बुटवल । बुटवलको लुम्बिनी प्रादेशिक अस्पतालको कोभिड विरुद्धको खोप कार्यक्रममा विवाद उत्पन्न भएपछि कार्यक्रम स्थगित भएको छ ।
खोप कार्यक्रम स्थगित भएपछि अस्पतालका लागि आएका २ हजार डोज खोपमध्ये एक सय ८४ डोज खोप नलगाई फर्काइएको छ ।
अस्पतालमा खोप लगाउन आएकाहरुले आफूले नपाएको भन्दै विवाद झिकेपछि स्थिती नियन्त्रणबाहिर जान नदिन खोप अभियान नै रोक्नु परेको अस्पतालले जनाएको छ ।
अस्पताललाई हिजो शुक्रबार र आज शनिबार गरी २ हजार डोज खोप आएको थियो । तिमध्ये १ हजार ८ सय १६ डोज खोप लक्षित समूका व्यक्तिले विवाद सुरु हुनुअघि नै लगाइसकेका थिए ।
अभियान रोकिएपछि विहानै देखि खोप लगाउन हातमा परिचय पत्र बोकेर लाइन लागेको धेरै व्यक्तिहरुले खोप नपाएर फर्कनु परेको छ ।
अस्पतालका सूचना अधिकारी डा विष्णु गौतमले आज शनिबार वैदेशिक रोजगारमा जानेहरुका लागि मात्रै अस्पतालको खोप केन्द्रमा खोप लगाउने व्यवस्था गरिएकोमा अरु समूहका व्यक्तिहरु खोप लगाउन आएपछि समस्या आएको बताए ।
फर्काइएको खोपहरु स्वास्थ्य कार्यालयलाई नै दिइने उनले जानकारी दिए । ‘हामीकहाँ त खोपकेन्द्र मात्रै हो, जिल्लाको खोप समितिको निर्देशन अनुसार नै खोप लगाएका हौं,’ उनले भने–‘तर आफूले खोप लगाउन नपाएको भन्दै केही व्यक्तिहरुले विवाद झिकेर ढुङ्गामुढाको स्थिती बनेपछि अभियान रोकिएको हो ।’
1729575388.jpg)
