बुटवल–पश्चिम क्षेत्रका ठूला बस व्यवसायीले सरकारले सार्वजनिक सवारी साधन सञ्चालन गर्नेगरी गरेको निर्णय तत्काल कार्यान्वयन गर्न नसक्ने बताएका छन्।
एउटा जिल्लाभित्रमात्रै बस चलाउन सक्ने गरी भएको निर्णय कार्यान्वयन गर्न व्यवहारिक कठिनाई हुने उनीहरुको तर्क छ।
मुलुककै धेरै बस सञ्चालन गर्नेमध्येको एक पश्चिम नेपाल बस व्यवसायी प्रालिले सरकारले गरेको निर्णय कार्यान्वयन गर्न कठिनाइ हुने तर्क गर्दै तत्काल गाडी चलाउन नसक्ने बताएको छ।
करीब १ हजार बस रहेको सो प्रालिले सरकारको निर्णय व्यवहारिक नभएको भन्दै जिल्ला भित्रमात्रै गाडी सञ्चालन गर्न नसक्ने तर्क गरेको हो।
प्रालिका अध्यक्ष दधिराम खरेलले सरकारले जिल्लाभित्रमात्रै गाडी चलाउने निर्णय अव्यवहारिक र असान्दर्भिक रहेकाले तत्काल बस चल्न नसक्ने बताए।
‘सरकारले गरेको यो निर्णय सान्दर्भिक छैन, उनले भने–हामी मातहतका बस तत्काल सञ्चालन गर्न सक्दैनौं, कहिले सञ्चालन गर्न सकिन्छ भन्नेबारे छलफल गरेर मात्रै निर्णय लिन्छौं।’
उनले एक जिल्लाबाट अर्को जिल्ला जान चाहने यात्रुलाई जिल्लाको सीमासम्म लगेर छाड्नुपर्ने गरी सरकारले गरेको निर्णयको व्यवहारिक कार्यान्वयन हुन नसक्ने बताए।
‘सरकारले कम्तीमा पनि प्रदेशका राजधानीहरुलाई केन्द्र मानेर प्रदेशभित्र चल्न दिने गरी निर्णय गर्नुपथ्र्यो, उनले भने–निम्नवर्गका जनताको स्वास्थ्यमाथि खेलवाड गर्ने र एक जिल्लाबाट अर्को जिल्ला पुग्नुपर्ने यात्रुलाई अलपत्र पार्ने गरी निर्णय भएको छ, यो व्यवहारिक हुँदैन।’
सिद्धार्थ यातायात प्रालिले पनि तत्काल बस चलाउन सक्ने अवस्था नरहेको बताएको छ। गाडी मर्मत र मजदुर आउन समय लाग्ने भएकाले तत्काल गाडी चल्न नसक्ने प्रालिका अध्यक्ष सूर्यबहादुर सारुले बताए।
रुपन्देहीको भैरहवामा प्रधान कार्यालय रहेको सिद्धार्थ यातायात प्रालि अन्तरगत रहेका २४ वटा गाडी साउनको पहिलो सातादेखि सञ्चालन गर्ने गरी तयारी भैरहेको उनले बताए।
‘अहिले तत्कालै त गाडी चलाउन सकिदैन, यति लामो समयसम्म नचलाएरै राखेका गाडी मर्मत गर्नुपर्ने हुन्छ, उनले भने–मर्मत गरेर साउनदेखि सञ्चालन गर्नेगरी तयारी गर्छौं।’
पश्चिम क्षेत्रका यी दुई ठूला बस व्यवसायी प्रालिका बस रुपन्देहीदेखि प्रदेश ५ का सबैजसो जिल्ला, काठमाडौंलगायत मुख्य शहरहरुमा समेत जाने गरेका थिए।